ಬಿ.ವಿ. ಕಾರಂತ ಪ್ರಶಸ್ತಿ

ರಂಗಭೂಮಿಯು ಸದಾ ವರ್ತಮಾನದ ತಲ್ಲಣಗಳಿಗೆ ಸ್ಪಂದಿಸುತ್ತಾ ತನ್ನ ಸೃಜನಶೀಲ ಪ್ರಯೋಗಗಳ ಮೂಲಕ ವರ್ತಮಾನದ ಸಮಾಜಕ್ಕೆ ಐತಿಹಾಸಿಕ, ಪೌರಾಣಿಕ ವಿಷಯವಸ್ತುಗಳ ಮೂಲಕ ಸಾಮಾಜಿಕ ಮೌಲ್ಯಗಳನ್ನು ಪುನರುಚ್ಚರಿಸುತ್ತ ಜಾಗೃತ ಸಮಾಜಕ್ಕೆ ಕಾರಣವಾಗಿದೆ.

ರಂಗಭೂಮಿಯ ಸಾಧಕರಿಗೆ ಸರ್ಕಾರವು ಪ್ರತಿ ವರ್ಷ ಗುಬ್ಬಿ ವೀರಣ್ಣ ಪ್ರಶಸ್ತಿ ನೀಡುತ್ತ ಬಂದಿದೆ. ರಂಗಭೂಮಿಯ ವ್ಯಾಪ್ತಿ ಮತ್ತು ವಿಸ್ತಾರದ ಹಿನ್ನೆಲೆಯಲ್ಲಿ ಹೆಚ್ಚು ಹೆಚ್ಚು ವೃತ್ತಿ ರಂಗಭೂಮಿಯ ಕಲಾವಿದರಿಗೇ ಪ್ರಶಸ್ತಿ ನೀಡಲಾಗುತ್ತಿತ್ತು. ಹೆಚ್ಚಿನ ಸಾಧಕರನ್ನು ಗುರುತಿಸಲನುವಾಗುವಂತೆ ಹವ್ಯಾಸಿ ರಂಗಭೂಮಿಗೆ ವಿಶೇಷ ಪ್ರಶಸ್ತಿಯೊಂದನ್ನು ಸ್ಥಾಪಿಸಲು ಸರ್ಕಾರವು ತೀರ್ಮಾನಿಸಿತು.

ಅದರಂತೆ ಸರ್ಕಾರವು ೨೦೧೪ನೇ ಸಾಲಿನಿಂದ ಹವ್ಯಾಸಿ ರಂಗಭೂಮಿಯ ಸಾಧಕರಿಗೆ ಬಿ.ವಿ. ಕಾರಂತ ಪ್ರಶಸ್ತಿ ಸ್ಥಾಪಿಸಿದ್ದು, ಹವ್ಯಾಸಿ ರಂಗಭೂಮಿಯ ನಿರ್ದೇಶಕರು, ನಾಟಕಕಾರರು, ನಟ/ನಟಿ, ರಂಗ ಸಂಗೀತ ತಜ್ಞರನ್ನು ಮತ್ತು ತಂತ್ರಜ್ಞರನ್ನು ಗುರುತಿಸಿ ಪ್ರಶಸ್ತಿ ನೀಡಲು ತೀರ್ಮಾನಿಸಿದೆ.

ಆಧುನಿಕ ಭಾರತೀಯ ರಂಗಭೂಮಿಯ ಹರಿಕಾರರಲ್ಲಿ ಒಬ್ಬರಾದ ಬಾಬುಕೋಡಿ ವೆಂಕಟರಮಣ ಕಾರಂತರು, ಕನ್ನಡ ರಂಗಭೂಮಿಯ ಮಟ್ಟಿಗೆ ಕರ್ನಾಟಕಕ್ಕೆ ರೆಪರ್ಟರಿ ಪರಿಕಲ್ಪನೆಯನ್ನು ಮರು ಸೃಷ್ಟಿಸಿದವರು. ಅವರ ಕಲ್ಪನೆಯ ಕೂಸಾದ ’ರಂಗಾಯಣ’ ಇಂದು ರಂಗ ಜಗತ್ತಿನಾದ್ಯಂತ ತನ್ನ ವಿಶಿಷ್ಟ ಪ್ರಯೋಗಗಳ ಮೂಲಕ ಮನೆಮಾತಾಗಿದೆ. ಬಿ.ವಿ. ಕಾರಂತರ ಪ್ರಶಸ್ತಿಯನ್ನು ಮೈಸೂರು ರಂಗಾಯಣ ನಡೆಸುವ ವರ್ಷದ ಮಹತ್ವದ ಬಹುರೂಪಿ ಬೃಹತ್ ಕಾರ್ಯಕ್ರಮದ ಸಂದರ್ಭದಲ್ಲಿ ಕೊಡಮಾಡಬೇಕೆಂದು ನಿರ್ಣಯಿಸಲಾಗಿದೆ.

ಬಿ.ವಿ. ಕಾರಂತರು ಬೆಂಗಳೂರಿನಲ್ಲಿ ಬೆನಕ ತಂಡವನ್ನು ಆರಂಭಿಸಿದರು. ಮಧ್ಯಪ್ರದೇಶದ ಭೋಪಾಲ್‌ನಲ್ಲಿ ರಂಗಮಂಡಲವನ್ನು ಆರಂಭಿಸಿದರು. ರಾಷ್ಟ್ರೀಯ ನಾಟಕ ಶಾಲೆಯ ಪ್ರಥಮ ವರ್ಷದ ವಿದ್ಯಾರ್ಥಿಯಾಗಿ, ನಂತರ ಅದೇ ನಾಟಕ ಶಾಲೆಯ ನಿರ್ದೇಶಕರಾಗಿ, ಭಾರತೀಯ ರಂಗಭೂಮಿಗೆ ಹೊಸ ಹರಹು ಮತ್ತು ವ್ಯಾಪ್ತಿ – ವಿಸ್ತಾರಗಳನ್ನು ದೊರಕಿಸಿಕೊಟ್ಟವರು.

ಕರ್ನಾಟಕ ಸರ್ಕಾರವು ೨೦೧೪ನೆಯ ಸಾಲಿನಿಂದ ಸ್ಥಾಪಿಸಲಾದ ಹವ್ಯಾಸಿ ರಂಗಭೂಮಿ ಕ್ಷೇತ್ರದಲ್ಲಿನ ವಿಶಿಷ್ಟ ಸಾಧಕರಿಗೆ ಕೊಡಮಾಡುವ ಬಿ.ವಿ. ಕಾರಂತ ಪ್ರಶಸ್ತಿಯನ್ನು ಕನ್ನಡ ನಾಡಿನ ಜನತೆಯ ಪರವಾಗಿ ಶ್ರೀ ವಿ. ರಾಮಮೂರ್ತಿ ಅವರಿಗೆ ನೀಡಿ ಗೌರವಿಸಲು ಹರ್ಷಿಸುತ್ತದೆ.

ವಿ. ರಾಮಮೂರ್ತಿ

ವಿ. ರಾಮಮೂರ್ತಿ ಅವರು ರಂಗಭೂಮಿಯ ಹಿರಿಯ ಅನುಭವಿ ಮತ್ತು ಸೃಜನಶೀಲ ತಂತ್ರಜ್ಞರಲ್ಲಿ ಒಬ್ಬರು. ಭಾರತೀಯ ರಂಗಭೂಮಿ ಮತ್ತು ರಂಗ ಪ್ರದರ್ಶನಗಳಲ್ಲಿ ನಾವೀನ್ಯತೆಯನ್ನು ತಂದವರು. ವಿಶೇಷವಾಗಿ ಹವ್ಯಾಸಿ ರಂಗಭೂಮಿಯಲ್ಲಿ ಹೊಸ ಸಾಧ್ಯತೆಗಳನ್ನು ಕಲಾವಿದರಿಗೆ ಪರಿಚಯಿಸಿದವರು. ತಮ್ಮ ಎಂಭತ್ತರ ಇಳಿ ವಯಸ್ಸಿನಲ್ಲಿಯೂ ಬತ್ತದ ಉತ್ಸಾಹದಿಂದ ರಂಗಭೂಮಿ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ತೊಡಗಿರುವ ವಿ. ರಾಮಮೂರ್ತಿ ಅವರು ಕನ್ನಡ ರಂಗಭೂಮಿಯ ಅನನ್ಯತೆಗೆ ಸಾಕ್ಷಿ.

೧೯೩೫ ರಲ್ಲಿ ಬೆಂಗಳೂರಿನಲ್ಲಿ ಜನಿಸಿದ ವಿ. ರಾಮಮೂರ್ತಿ ಅವರ ರಂಗಭೂಮಿಯ ನಂಟು ೧೯೫೨ ರಷ್ಟು ಹಿಂದಿನದು. ಜೀವನೋಪಾಯಕ್ಕಾಗಿ ಉದ್ಯೋಗಿಯಾಗಿದ್ದ ಐಟಿಐ ಸಂಸ್ಥೆಯ ಉದ್ಯೋಗವನ್ನು ತ್ಯಜಿಸಿ ೧೯೫೯ರಲ್ಲಿ ಅಬ್ರಾಹಂ ಅಲ್ಕಾಜಿ ನಿರ್ದೇಶಕರಾಗಿದ್ದ ಏಶಿಯನ್ ಸ್ಕೂಲ್ ಆಫ್ ಥಿಯೇಟರ್ ಎಂದು ಹೆಸರಾಗಿದ್ದು, ನಂತರ ನ್ಯಾಷನಲ್ ಸ್ಕೂಲ್ ಆಫ್ ಡ್ರಾಮಾ ಸಂಸ್ಥೆಯ ಪ್ರಥಮ ವರ್ಷದ ವಿದ್ಯಾರ್ಥಿಯಾಗಿ ಪದವಿ ಪಡೆದವರು ರಾಮಮೂರ್ತಿ. ನ್ಯೂಯಾರ್ಕಿನ ಹವಾಯಿ ವಿಶ್ವವಿದ್ಯಾಲಯದ ಇನ್‌ಸ್ಟಿಟ್ಯೂಟ್ ಆಫ್ ಥಿಯೇಟರ್‌ನಲ್ಲಿ ರಂಗಭೂಮಿಯ ತಂತ್ರಜ್ಞಾನದ ಸಾಧ್ಯತೆಗಳ ಉನ್ನತ ಶಿಕ್ಷಣ ಪಡೆದರು. ಆಗ ಅಲ್ಲಿಯ ಸುಪ್ರಸಿದ್ಧ ನಾಟಕ ಪ್ರದರ್ಶನಗಳಿಗೆ ರಾಮಮೂರ್ತಿ ರಂಗಸಜ್ಜಿಕೆ ಸಂಯೋಜನೆ ಮತ್ತು ಬೆಳಕಿನ ವಿನ್ಯಾಸ ಕಾರ್ಯವನ್ನು ನಿರ್ವಹಿಸಿದರು. ರವೀಂದ್ರ ಕಲಾಕ್ಷೇತ್ರವೂ ಸೇರಿದಂತೆ ನಾಡಿನ ಹಲವು ರಂಗಮಂದಿರಗಳ ಬೆಳಕು ಮತ್ತು ಧ್ವನಿ ವಿನ್ಯಾಸಗಳನ್ನು ಮಾಡಿಕೊಟ್ಟವರು ವಿ. ರಾಮಮೂರ್ತಿ ಅವರು.

ತಾಯ್ನಾಡಿಗೆ ಮರಳಿದ ಮೇಲೆ ರಾಮಮೂರ್ತಿ ಬಿಡುವಿಲ್ಲದೆ ರಂಗಭೂಮಿಯ ಎಲ್ಲ ವಿಭಾಗಗಳಲ್ಲೂ ದುಡಿಯತೊಡಗಿದರು. ಅಲ್ಲದೆ ಅನೇಕ ರಾಷ್ಟ್ರೀಯ, ಅಂತರರಾಷ್ಟ್ರೀಯ ರಂಗಸಂಬಂಧಿ ಸಂಸ್ಥೆಗಳಿಗೆ ಬೆಳಕಿನ ಸಂಯೋಜನೆಯ ಪರಿಣತರಾಗಿ, ಅತಿಥಿ ಉಪನ್ಯಾಸಕರಾಗಿ ಹಲವು ವಿಶ್ವವಿದ್ಯಾಲಯಗಳಿಗೆ ತಮ್ಮ ಅನುಭವವನ್ನು ಧಾರೆ ಎರೆದಿದ್ದಾರೆ. ಅವರ ಕ್ರಿಯಾಶೀಲ ರಂಗ ತಾಂತ್ರಿಕತೆ ರಂಗಜಗತ್ತನ್ನು ಶ್ರೀಮಂತಗೊಳಿಸಿದೆ. ಸ್ನೇಹಭಾವ ಮತ್ತು ರಂಗಪ್ರೇಮವನ್ನು ಉಳಿಸಿಕೊಂಡ ಮಹನೀಯರು ಅಂದಿನ ಶಿಸ್ತು, ಸಮಯಪಾಲನೆಯನ್ನು ಇಂದಿಗೂ ಮುಂದುವರಿಸುತ್ತ ಬಂದವರು. ರಂಗಭೂಮಿಯ ಕೆಲಸ ಎಂದರೆ ಸದಾ ಹುರುಪಿನಿಂದ ತೋಳೇರಿಸಿ ನಿಲ್ಲುವ ಈ ಅನನ್ಯ ರಂಗಕರ್ಮಿಯನ್ನು ನಾಡಿನ ಹಲವು ಗೌರವ ಪುರಸ್ಕಾರಗಳು ಅರಸಿ ಬಂದಿವೆ.
ಶ್ರೀ ವಿ. ರಾಮಮೂರ್ತಿಯವರಿಗೆ ಪ್ರೀತಿಯ ಅಭಿನಂದನೆಗಳು.